რა პროცესებს გადის ალგორითმი, სანამ შედეგებს მოგვაწვდის?

როგორც კი საძიებო ველში მომხმარებელი ,,კითხვას” ჩაწერს, საუკეთესო ,,პასუხის” მოსაძებნად სისტემაში კომპლექსური პროცესი იწყება და უკვე crawling-გავლილი და დაინდექსებული გვერდებს შორის ერთგვარი შეჯიბრი იმართება. მოდი, პროცესის შემადგენელი კომპონენტები დაწვრილებით განვიხილოთ: 

1. შეკითხვის გაანალიზება

პირველი ნაბიჯი შეკითხვის გაფილტვრა და გაანალიზებაა. ალგორითმი შეკითხვას ,,უსარგებლო” სიტყვებს გამოაკლებს და დატოვებს მხოლოდ საკვანძოებს. მაგალითისთვის ინგლისურენოვან ბრძანებას შევხედოთ: "a nice photograph of the Moon," სადაც “a”, “of” და “the” გუგლისთვის უმნიშვნელოა. თუმცა, იგივე “of” მნიშვნელობას იძენს შემდეგ სიტყვათაწყობაში: “Statue of Liberty”. 

• შემდეგში, როცა გუგლისგან რჩევა დაგჭირდება, ნუ ჰკითხავ “how can I check if my website is indexed by Google”; ამის ნაცვლად უბრალოდ საკვანძო სიტყვები გამოიყენე: “check website indexability”. ასე შედეგს უფრო სწრაფად მიიღებ.

გაფილტვრის გარდა, გუგლი ამოიცნობს სიტყვათა კომბინაციებს, გააერთიანებს მათ და ერთ მნიშვნელობას ანიჭებს. მაგალითად, ,,თავისუფლების ქანდაკება” ორი სიტყვაა, მაგრამ მნიშვნელობა ერთი აქვს. როცა გუგლს ვეუბნებით, რომ თავისუფლების ქანდაკება გვაჩვენოს, ჩვენ არც ცალკე აღებულ ,,თავისუფლებას” ვეძებთ და არც - ,,ქანდაკებას”, არამედ ,,თავისუფლების ქანდაკების” სურათების დათვალიერება გვინდა. 

მეტიც, გუგლის საძიებო სისტემას სინონიმები და ძიების ობიექტთან დაკავშირებული სხვა სიტყვებიც ესმის. მაგალითად, თუ საძიებო ველში ,,მანქანის ყიდვას” ჩაწერ (და არა: ,,როგორ შემიძლია ვიყიდო მანქანა”!), შედეგებში ,,ავტომობილის ყიდვაც” გამოჩნდება. 

2. შედეგის მოძიება

გაფილტრულ-გაანალიზებულ კითხვას ალგორითმი გუგლის ინდექსს უგზავნის, ინდექსი კი პოტენციურად რელევანტურ შედეგებს აბრუნებს. ოღონდ, ეს მხოლოდ დასაწყისია.

3. შედეგების დალაგება 

საკვანძო პროცესი შედეგების მიღებისთანავე იწყება. ამ დროს გუგლმა უნდა აარჩიოს, რომელ გვერდს მისცეს უფრო მაღალი რეიტინგი და, შესაბამისად, მაღალი პოზიცია ძიების შედეგების გვერდზე. ამ დროს გუგლი უმეტესად კონტენტის ხარისხის მიხედვით მსჯელობს, მაგრამ სხვა ფაქტორებსაც დიდ ყურადღებას აქცევს: 

საბაზისო ინფორმაცია მომხმარებელზე: მომხმარებლის ლოკაცია, ენა, ძიებისას გამოყენებული მოწყობილობის ტიპი და ა.შ. მაგალითად, გუგლმა გერმანიასა და საქართველოში მცხოვრებ ორ სხვადასხვა მომხმარებელს, რომლებსაც  მანქანის შეკეთება სურთ, ერთი და იგივე პროფილაქტიკა არ უნდა შესთავაზოს. 

გვერდის ხარისხი: ხარისხს განაპირობებს ტექსტური და ვიზუალური კონტენტი, ვებსაიტის ღირებულება გუგლისთვის და სხვა საზომები. მათი შეფასებით, ალგორითმი ადგენს, რამდენად საჭირო, სანდო და უნიკალურ ინფორმაციას მიიღებს მომხმარებელი კონკრეტული გვერდისგან. 

შეკითხვის ტიპი: შეკითხვა, ანუ სიტყვების ერთობლიობა, რომელსაც საძიებო ველში ვწერთ, სხვადასხვა ტიპისაა და შედეგსაც არსობრივად განსხვავებულს აბრუნებს. მაგალითად, ,,ავტომობილის ყიდვა” შემოგთავაზებს ადგილობრივ მაღაზიებს, ,,წითელი ავტომობილი” კი - წითელი ავტომობილის სურათებს. 

4. შედეგების ფორმა

გუგლის საძიებო მექანიზმი ისეა შედგენილი, რომ მომხმარებელს არა მხოლოდ შინაარსობრივად რელევანტური ინფორმაცია მიაწოდოს, არამედ ეს გააკეთოს შესაბამისი ფორმატითაც. მაგალითად, აარჩიოს რუკას, ტექსტურ მასალას, სურათებსა და სხვა ვარიანტებს შორის. 

5. შედეგების დახვეწა 

გუგლის მიზანია, მომხმარებელს საჭირო, გამოსადეგი შედეგი უჩვენოს. ამიტომაც, მთელი ეს პროცესი, რაც ზევით აღვწერეთ, დინამიკური და განგრძობადია. ალგორითმი მუდმივად ატარებს ექსპერიმენტებს, რასაც ხშირად მოულოდნელი მიგნებები მოსდევს ხოლმე. 

ჩვენს შემდეგ სტატიაში ტექსტურ შედეგებს განვიხილავთ და გაგიზიარებთ საუკეთესო SEO სააგენტოების მიერ კარგად ნაცად პრაქტიკებს შედეგების სამართავად და გასაუმჯობესებლად.